Beteluko Araxes ikastetxeko 1. eta 2. mailako neska-mutilak, azaroan eskaera egin ondoren, ekainaren 6an, astelehena, Zarauzko Igerain Aterpetxean maletak utzi eta Getariara joan ginen, gure lehen kanpaldia bizitzeko asmoz, urduri eta gogotsu.
Getarian, Elkanoren eskultura ikusi eta kale estuetatik barna ibili ondoren, hondartzan bainatu ginen eta karramarroak hartzen aritu ginen. Parke batean bazkaldu genuen eta tipi-tapa, mendiko bidexkatik barna, oinez itzuli ginen Zarauzko aterpetxera. Bideko landare eta zuhaitzak izendatuz oharkabean iritsi ginen. Dutxa ederra hartu ondoren, bapo afaldu eta adostutako “txorakeri saioan” ederki pasa genuen. Nekatuta geunden eta ederki lo egin genuen.
Biharamunean, trena hartu eta Zumaia aldera abiatu ginen. Bertako hondartzan harearekin eraikuntzan aritu ondoren, Zarautzera itzuli ginen bazkaltzera. Arratsaldean hondartzan olatuekin gozatu ederra hartu genuen eta harezko “jakusi erraldoia” eraiki genuen denon artean. Afal ondoren, adostutako jolas, antzerki eta emanaldiekin izugarri gozatu eta gero, lotara joan ginen. Bigarren mailako Enaitzek emanaldi zoragarria eskaini zigun erraldoiak dantzan jarriz. Aho zabalik utzi gintuen. Gainerakoek antzerkitxoak prestatu genituen panpintxoekin eta abar. Ez genuen inongo presarik lotara joateko!
Asteazkenean, gosaldu ondoren, batzuk gimnasioan jolasten eta beste batzuk gutunak idazten eta margotzen aritu ondoren, autobusa berehala zain genuela ikusirik, etxerako bidea hartu genuen. Zoragarria izan zen: denak elkarrekin, denak pozik, denak parte hartuz, denak jolastuz, giro ezin hobean….Ederra izan zen benetan!
